Festohet 80 - Vjetori i Brigadës XV Sulmuese partizane të Ushtrisë Nacional - Çlirimtare në Pogradec
Me ftesë të bashkisë, u mblodhëm në qytetin e Pogradecit për të festuar 80-vjetorin e krijimit të Brigadës XV Sulmuese, partizanë të Ushtrisë Nacionalçlirimtare shqiptare.
Autoritetet e qeverisjes vendore dhe përfaqësuesit e institucioneve politike lokale e rajonale, veç detyrimeve ligjore, mbajnë gjallë kujtesën kolektive dhe respektojnë edhe detyrimet morale në mbrojtje të vlerave të trashëgimisë së lavdishme historike, në nivel lokal-rajonal në territoret nën juridiksionin e përgjegjësive të tyre. Bashkia e Pogradecit, në kalendarin e festave për nderimin e ngjarjeve të 80-vjetorit të Çlirimit të Shqipërisë, kishte programuar festimet e krijimit të brigadës XV Sulmuese.
Si pasardhës e konsideruam sfidë pjesëmarrjen me dinjitet në këtë përvjetor! Ne nuk e kemi privilegjin e luftëtarëve të lirisë! Ne nuk jemi protagonistët e pritave dhe luftimeve e fitoreve mbi pushtuesin! Por kemi privilegjin të jemi pasardhës të tyre, titull e nder që duhet ta meritojmë me qëndrimet tona, në përmbushje të detyrave e përgjegjësive tona qytetare atdhetare!
Vlerat e historisë së LANÇ-it dhe fitoret e arritura mbeten gur themeli për Shqipërinë dhe nuk i përkasin një brezi e as disa individëve. Doemos kontributet duhen analizuar në hapësirë e në kohë, në raport me kushtet e përgjegjësitë konkrete. Sot dhe në takimet e përvjetorëve të tjerë do të rritet madhështia e veprës së çlirimtarëve antifashistë! Ne dhe pasardhësit e njëpasnjëshëm kujtojmë me përulje e respekt luftën dhe sakrificat e tyre dhe kemi të drejtë të legjitimojmë krenarinë për veprën e tyre dhe njëherazi përgjegjësitë tona në mbrojtje të fitoreve, në mbrojtje të vlerave për Liri, Pavarësi dhe Progres.
Çdo brez ka se çfarë të mësojë nga paraardhësit e vet e çfarë duhet t’u përcjellë pasardhësve. Prindërit tanë, po të jetonin, nuk do të ishin më të rinj se 95 vjeç. Ishte në sallë vetëm një veteran në moshën 97 vjeç. Patëm një kompleks ndjenjash në këtë përvjetor: dhimbje për mungesën fizike të prindërve e të afërmve tanë. Krenari që vepra e tyre rron me Shqipërinë e lirë e antifashiste! Krenari për arritjet në këta 80 vjet! Përgjegjësi për të merituar cilësimin e pasardhësit të luftëtarëve për liri, antifashizëm e progres!
Atdhetarizmi ka kuptim e peshë konkrete në çdo periudhë e për çdokënd në detyrat që kryen. Gjithkush duhet të dëshmojë e t’i kontribuojë me dinjitet identitetit shqiptar.
Mbërritëm pak para se të fillonin ceremonitë në Pogradec, por, tek lapidari, simbol i Brigadës XV Sulmuese, na pritën këngët partizane! Lapidari ishte i bukur mes gjelbërimit me sfond liqenin. Ishte i pastër, i mirëmbajtur dhe në krye valëvitej një flamur kombëtar.
Mbas nesh mbërritën nënkryetarja e bashkisë, zonja Entela Gusho, drejtuesi i PS për Pogradecin, Erjon Thëngjilli, nënprefekti i Qarkut të Korçës, Luan Maxhari, përfaqësues nga Këshilli i qarkut të Korçës, nga organizata e Familjeve të Dëshmorëve, shoqatat kulturore të krahinës dhe një numër i madh nga pasardhësit e veteranëve të Pogradecit.
Nën tingujt e marsheve partizane u vendosën kurorat me lule të freskëta. Bashkia ishte kujdesur të vendosej një kurorë nga përfaqësuesit e pasardhësve të partizanëve, dëshmorëve të LANÇ e heronjve të popullit të brigadës. Kjo kurorë u vendos nga djali i komandantit Flori Teki Kolaneci dhe nga Elidiana Murat Abazi Canaj.
Ceremonia e rastit u zhvillua në Shtëpinë e Kulturës.
Edhe këtu “takimi” i parë ishte me një foto-ekspozitë në holl dhe me këngët partizane të interpretuara nga këngëtarë e instrumentistë të qendrës multikulturore të Pogradecit. Mbasi u sistemuan të pranishmit, u ekzekutua Hymni Kombëtar. U ngjit në skenë Entela Gusho. Përshëndeti pjesëmarrësit për mirëseardhjen dhe uroi këtë përvjetor. Solistët e qytetit interpretuan dy këngë partizane.